Zolai Gelhzia

Leitungbup Zomi akua mapeuh tungah Zolai gelhzia pawlkhat hong tangko kikkik ing. Zolai puahsiam mipil tampi ten zong hoih a sak kim uh ahih manin, akua mapeuh in zat kim diamdiam tek dingin deihsakna lianpi tawh hong khak ing. Ki theihsakna hilo a, vei man hizaw hi.

Zolai ahi a, bang lai ahi zongin, mun le mual min, mi' min cihte pen ahi bang lianin i gelh ding kisam hi. Yongon City cih bang pen Zangkong Siti cih bangin nong gelh ciangun khangthak momnote' a dingin lampialna khatpeuh hong suah khak ding ka dah simsim hi.

A diak in, media nasepna leh kipawlna tawh thu khat peuh nong suah tak uh ciangin, laimal diktak nong zat dinguh deih huai hi. Banghang hiam cih leh nomau' influence pen khangthak ten hong ciing ding hizen mawk ahih manin, hoihtak hong ngaih sun phapha un.

Mun minte:

Yangon City - Zangkong hilo.
Kalaymyo - Kawlpi cih tawh official in kizanglo.
Myanmar - Kawlgam cih tawh official in kizanglo.
China - Sen gam cih tawh official in kizanglo.

Mi minte:

Do Suan Mung cih banga mal thum tawh i gelh min pen Zomite' ngeina tawh kigelh laimal hizaw hi. Banghang hiam cih leh Zomite' ngeina ah min mal thum kinei hamtang zaw a, a mal masa pen bel mintap-pa' min hi a, a nunga-te pen khiatna nei-a kiphuak min malte a hihi.

Do Suan Mung:

"Do" pen mintap-pa' min hi-a, "Suan" pen suan le khak, tuleta cihna hi-in, Mung pen khuam banga muanhuai, belh cing, muantaak cihna hi-in, tuleta, suanlekhakte' a dingin mi muanhuai cihna ahihi.

Tua bang hinapi in, Dosuanmung ci-in hong gelh hi zenzen leh Zomite' min phuahzia leh min gelhzia ngeina susia hong suak a, a khiatna zong nei nawnlo hi. Hih pen minam dangte tawh kibat lohna khat ahihi.

Min i phuah ciangin zong, min ngaih leh min hoih theithei i phuah ding kisam mahmah hi. Min hoih khollo pen mi ten zong mang naleng in hong matnop loh uh ahih manin, min i phuah ciangin, a ngaih thei pen mah phuak ni. Zomite' ngeina leh ciinzia ah min hoih pawlkhat a nuai ah en ni.

Pasal min:

1) Khai
2) Mung
3) Tuang
4) Lian
5) Mang
6) Khual

Numei min:

1) Cing
2) Lian
3) Niang
4) Kim
5) Lun
6) San
7) Huai
8) Ciang

Hih a tunga teng pen gentehna a kong gelh hi a, a khiatna zong a hoih vive hipah lel hi. Mi dang khat peuh in, mangin hong mat phial leh zong manghoih a kaai ding min vive hipah hi. Mun le mual i gelh ciangin zong ahi bang lian mah in gel lel lehang hoih zaw hi.

Dal Sian Hung
Src : Zominam

Zo Linguistics

1. Cing

Sm Cing Neem Lun in a sang naupang te cingciang tawh sat a, Cingpikot a sang naupang nu le pa te in "hi  bang nau cing" ci in zum ah khia uh hi. Sm Cing Neem Lun zum panin ki sama, a cing dingin Palik(police) te sawl uh hi. Thu a ki dot ciangin "ka nau cinte cing lo lua uh a ka sat hi" ci in dawng kik hi.

2. Ciang
Nu Niang Lian Cing in a tate lawh leh ciang tawh ngasa beng dinga pusuak te a ngaihtuah ciangin a lung himawh a, "tu ciang dong ong tung lo. Bang ci ciang hi ding hiam? Va en dih in" ci in a pasal sawl hi. Ciangpi/Ciangsawn mual ah Pi Ciang Vung in vaimim bawk te a sengah ciang venvan sa in pua a, "khop pian na hia? ciang khut na deih hia?" ci in dong hi. Pi Ciang Vung in a vaimim bawk te ciang sitset a hih manin tang cilciang ah a but khiat ciangin tam mahmaha, a tate ciangkang tawh sat sak sawnsawn lai hi.

3. Khup

Tua laitak in Cing Khup leh Ngam Bawm in Thang Ho leh Lian Do te unau, ciangpi nuai a ki khup a muh uh ciangin, a khup(h)  na ciang hong khia in, "hi cianga na ni un ong bawl, ong ngai kei na lawmlawm ee. Tu  in pai unla, na ni leh na gang khup un, a maute sangin nuamsa zaw un" ci in thupha pia in paikhia sak hi.

4. Tom

Nu Hau Tom in sing tom dingin kuankhia a, a singtom te tom tan tiltel a hih manin, a inveng tangval pa in "tom tan na cia, U Tom" a cih leh, "ka tom na ken lua a, a lakna haksa sa in ka tom tan hi" ci in na dawng hi. Tua leh inn a tun teh a pasal na kitom a, "bang hiam aw, nang ki tomtom zong, kei lah tom, ka singtom lah tom sa lua a na heh a suak hiam?" a cih leh "na sing tom ding ong gen lo na hih cianga ka lung ong tom vat hi. Na tom hang bel hi tuan kei" ci in dawng kik hi.
5. Lim

Tangval khat limlang ah va ki en aa thatang hoih sa pian a hih manin "limci si'ng ee" ki ci hi. A nu in "Bawi, bang a hia a limci? na lim(image) bek ka mu a" a cih leh "huan a i ankam cinte hi ee" ci in dawng vat hi. Tua leh tangval pa zong a lawmnu kiang laikhak gelh a "Ngaihno aw, na nahlim nuai ah sambang zal nuam na sing ee...ka tawi kawlciang mui bangin zangin, muilim in a om leh na saulim liap nuaiah thutvum kong khawl ni ding hai bang ngaklah ing." Tua laitak a nu in "Bawi aw, lim ta keileh ankuan um khawm dihni" ci in sam vat hi. "Nu aw, na an huan ka neek main limtuak tak ei ka cih hi ven...ka nek ma a ka upmawh zah sang na lim zaw" ci a, a nu in "a lim limlim hi ee..na kam ah.." ci in kamsiam na paih phei hi. "Tua a hih leh Bawi aw, limsing kang va tom khawm dih ni" ci in a tapa zawn leuleu hi.